صدیقه دولت آبادی

"صدیقه دولت آبادی" (1340-1261) ایرانلی قزئته‌چی و مشروطه اینقلابی‌ و ایران قادین حرکاتی‌نین چالیشانلاریندان ایدی. او مشروطه‌چی "انجمن مخدرات وطن" درنگی‌نین قورجولاریندان اولوب. "زبان زنان" آدلی ایلک قادین درگیسینی فارس دیلینده چیخارتمیشدیر.

یاشاییشی

صدیقه دولت آبادی 1261.نجی ایلده اصفهان‌دا دوغولوب. آتاسی هادی دولت آبادی و آناسی خاتمه‌بیگم ایدی. آتاسی دؤرون قاباقجیل روحانی‌لریندن ساییلیردی. صدیقه دولت آبادی تحصلینی فارس و عرب دیللرینده تهران‌دا باشلاییب سونرا اورتا تحصیلینی دارالفنون دا داوام ائتدیرمیشدی. اون بئش یاشیندا ایکن اعتضاد الحکما ایله ائولندی آنجاق بو ائولی‌لیک اوغورسوز اولدو. 1296.نجی گونش ایلینده، ایلک قیز مدرسه‌لریندن ساییلان، "مکتب شرعیات" آدلی بیر مدرسه آچدی.

صدیقه دولت آبادی، بیر کره فعالیت‌لری سیراسیندا توتوقلاناندا، نظمیه رئیسی اونا دئمیشدی: "خانیم! سیز یوز ایل تئز دونیایا گلمیشسیز". صدیقه دولت آبادی جاوابدا دئمیشدی: "آغا! من یوز ایل گئج دونیایا گلمیشم، تئز دوغولسایدیم قویمازدیم قادینلار  سیزین تاپداغینیز آلتیندا اسیر اولسونلار".

صدیقه دولت آبادی، 6 مرداد 1340-جی ایلینده 80 یاشیندا تهران دا دونیاسی دگیشدی. زرگنده ده، امامزاده اسمعیل قبرستانلیغیندا قارداشی‌نین یانیندا تورپاغا تاپشیریلدی. ایران اینقلابیندان سونرا کیمی‌لری اونون مزارینی محو ائله‌دیلر.

قایناق

• شبکه بین‌المللی همبستگی با مبارزات زنان ایران
• خانم شما صد سال زود به دنیا آمدید!، گل آقا
• الیز ساناساریان (۱۳۸۴)، جنبش حقوق زنان در ایران (طغیان، افول و سرکوب از ۱۲۸۰ تا انقلاب ۱۳۵۷)، تهران: نشر اختران،

چئویرن: عباس ائلچین